LEGAZPI CITY – Plano kan nagkapirang transport groups na magpadagos na paglulunsar nin mga tigil pasada bilang pagkontra sa Public Utility Vehicle Modernization Program.
Ngunyan na semana kan matapos na an tolong aldaw na transport strike na inilunsar kan grupong Pagkakaisa ng mga Samahan ng Tsuper at Operator Nationwide asin MANIBELA.
Sa intrevista kan Bombo Radyo Legazpi kay Mody Floranda an Presidente kan Pagkakaisa ng mga Samahan ng Tsuper at Operator Nationwide, plano kan saindang grupo na maglunsar na naman nin hiro protesta sa maabot na Agosto 23 aldaw nin Biyernes.
Agrangay kan grupo na labing kadipisilan an pigdara kan programa sa saindang sektor huli sa kakulangan nin plano kan gobyerno kung papano asin sain makakabakal kan modernized jeepney.
Problema man an mahal na presyo kan bagong modelo kan jeep na nag-aabot nin lampas sa sarong milyong piso mantang kulang pa an ipigpapaluwas na bagong ruta.
Pangapudan kan grupo na suspendiron na muna an Public Utility Vehicle Modernization Program asin saka na sana idagos an pagpapaotob kaini kung napakaray na an mga nahihiling na problema.
Sa maabot na Lunes nakatalaan na makipag-ulay an Pagkakaisa ng mga Samahan ng Tsuper at Operator Nationwide asin MANIBELA kay Senate President Chiz Escudero ngani na diskutiron an problema.
