LEGAZPI CITY—Ipagbarewas kan Albay Provincial Health Office an nasa 20 toilet bowls para sa mga residenteng nagtetenir sa Tent City sa banwaan kan Malilipot, Albay huli kan nagpapadagos na aktibidad kan bulkang Mayon.
Segun ki Albay Provincial Health Office Food and waterborne diseases coordinator Anthony Ludovice, sa intrevista kan Bombo Radyo Legazpi, obheto kan lakdang na magkaigwa nin sanitation an mga residenteng yaon sa nasabing tent city.
Dugang niya na wara man sindang nanutaran na krisis pag-abot sa sanitation asin natawan na man nin magkakanigong aksyon an mga nagkaigwa nin hand-and-foot disease sa lugar.
Nakatalaan an ahenysa na magkundusir nin lecture asin discussion madapit sa hygiene and sanitation, water and sanitation, asin food and sanitation sa Pebrero 10 sa nasambitang lugar nganing matukdoan an mga evacuees mapadapit sa tamang kalinigan sa sadiri asin kapalibutan.
Mientrasatanto, mahigot man na pagiromdom ni Ludovice sa gabos na mga residenteng nagtetenir sa mga evacuation centers na imantinir an kalinigan sa saindang pigteteniran, sa komunidad, sa mga pigkakaon nganing maibitaran an ano man na klase nin helang.
