LEGAZPI CITY—Nangangapudan an sarong opisyal kan lokal na gobierno kan Viga, Catanduanes sa Department of Public Works and Highways (DPWH) na maaksyunan an sarong tinampo sa Barangay Paraiso, San Miguel huli sa posibleng pagkagaba kaini dara kan mga naeeksperyensyahang pag-uuran.
Segun ki Viga Municipal Councilor, Jasper Adrian Sidlacan, sa intrevista kan Bombo Radyo Legazpi, haloy na suboot na siring kaini an sitwasyon kan tinampo alagad mas naglala ini dara kan mga nakaaging raot nin panahon.
Basado sa saindang obserbasyon na padiit-diit suboot na nagguguho an kadagaan kan tinampo huli sa mga padagos na naeeksperyensyahang pag-uuran sa provincia.
Sa pagladawan kan opisyal na sa irarom kan tinampo an igwa ining imburnal, alagad kun posibleng magaba an tinampo an mararaot an nasabing imburnal na pwedesir magin problema kun pano sinda makakabalyo pasiring sa ibang lugar.
Segun saiya na posibleng substandard an pagkonstruir kaini huli sa manipis asin warang bakal an tinampo na dapat kuta nang matibay an pagkakagibo digdi huli sa saro ining national road.
Sa ibong na banda, posible man na ngunyan na sana nagguho an kadagaan digdi huli na man sa kahaluyan kan nasabing tinampo.
Segun ki Sidlacan na en kaso magguho an kadagaan kan tinampo pwedesir na maaapektaran an pagbiyahe kan namamanwaan sa sirangan parte kan provincia kabale an munisipalidad kan Pandan, Gigmoto, Panganiban, Bagamanoc, asin Viga.
Saro pa sa saindang concerns na one-lane an nasabing tinampo kun kaya nangangapudan sinda na ma-aksyunan ini mantang naaagihan pa kan mga motorista.
Mientrastanto, naipaabot na man ninda an reklamo ki Catanduanes Governor Dr. Patrick Azanza magin sa DPWH Catanduanes kun ano an saindang magigin aksyon sa nasambitang tinampo.
