LEGAZPI CITY — Magabat suboot an laban kan Legazpi City Police kontra sa iligal na droga katakod kan mahigot na kampanya kan presenteng administrasyon na pagpuho sa drug menace sa Pilipinas.
Ini an ipighayag sa Bombo Radyo Legazpi ni PCI Arthur Gomez, tagapagtaram kan Albay Provincial Police Office (PPO.)
Sigon ki PCI Gomez, aminado an hepe kan Legazpi PNP na si PSUPT Nilo Berdin na madidipisilan an syudad na magin drug cleared kun sain sagkod ngunyan, nagtitinir na apektado nin ipinagbabawal na bulong an 16 na barangay.
Alagad sienerto ni Gomez na pigigibo kan nasambitan na hepatura an gabos asin nakikipagkoordinar sa Albay PPO asin sa local government unit partikularmente ki Mayor Noel Rosal.
Para kaya suboot ki Berdin, dae man pwedesir na hidalion an pagpapalibre sa iligal na droga huli ta kinakaipuhan na magin sierto antes na ideklarar na drug-free na an sarong lugar.
Kabale sa mga drug-affected barangays sa Legazpi na partikular na sinabi ni Gomez an Sabang, Victory Village, Bitano, Penaranda, San Roque asin Oro Site.
Apwera digdi, padipisilan man suboot an laban kontra droga sa mga syudad kan Tabaco asin Ligao.
Sinabi man kan opisyal na mawot kan hepe kan Legazpi na magin “slowly but surely” an prosesong ini ngani na dae sinda madaya.
