LEGAZPI CITY-–Arestado an sarong lalaki na suspek sa carnapping kun sain narekober man digdi an hinabonan na motorsiklo sa ginibong hot pursuit operation sa Ligao City.
Segun ki Ligao City Police Station Chief of Police Police Lieutenant Colonel Danny Baytec, sa intrevista kan Bombo Radyo Legazpi, nag-report sa saindang kustodiya an sarong delivery rider na residente kan Barangay Tamoling kan nasabing ciudad mapadapit sa saiyang nawawarang motorsiklo na nakaparada sa luwas kan saindang residencia.
Tulos na nagkundusir nin imbestigasyon an kapulisan kun sain saro sa hiniling an CCTV footage kan kataning na harong kan biktima, digdi nabisto an suspek asin nagsagibo nin hot pursuit operation an mga otoridad.
Nahanap an suspek sa kaparehong barangay asin narekober an hinabonan na motorsiklo.
Segun sa opisyal na warang maipahiling na dokumentos an suspek siring man na nabisto kan biktima na pagsadiri niya an naunambitang motor.
Sa presente, nasa kustodiya na kan Ligao CPS an suspek para sa magkakanigong disposisyon.
Mientrastanto, abiso man kaini sa mga motorista na ikandado an saindang mga behikulo asin dae basta pagbayaan; siring man na nakakamaray na iwalat ini sa lugar na maliwanag asin may CCTV nganing en kaso man na mawara an marikas man nindang mabisto an nanghabon kan behikulo.
Abiso man kaini sa mga residentes na magin alerto sa palibot, urog na kun may kaduda-dudang hiro sa lugar asin tulos na i-report sa otoridad nganing maiwasan an posibleng maraot na pigbabalak kan mga siring na indibidwal.
