LEGAZPI CITY — (Update) Isasairarom na sa stress debriefing sa masunod na semana an mga estudyante kan Bicol Central Academy sa Libmanan, Camarines Sur katakod kan nangyaring “school bag burning incident”.
Sinabi ni DepEd Bicol Director Gilbert Sadsad sa Bombo Radyo Legazpi, madugong diskusyon an nangyari sa nasabing isyu urog na kakabit kaini an mga ley dapit sa polisiya sa child protection.
Enot naman na ipighayag kan opisyal na babayadan man kan eskwelahan an mga nasulong gamit mantang pigpapa-leave of absence an administrador kan eskwelahan.
Kinontra man kan opisyal an mga nagsusuhestiyon na ipasarado na sana an eskwelahan o irevoke an lisensya urog na mayormenteng apektado kan lakdang an mga estudyante.
Katakod pa kan insidente, isasairarom man an mga paratukdo sa re-orientation sa Child Protection Policy tangarig na ipagirumdom an regular nang programa kan gobierno.
