Dagos nang napatalsik bilang Senate President kan 20th Congress si Senador Francis “Chiz” Escudero.
Rinibayan ni Senador Vicente “Tito” Sotto III si Escudero sa puwesto.
Sa plenaryo kan Senado, nagmosyon si Senador Juan Miguel Zubiri na i-nominate bilang bagong Senate President si Sotto na sinegundahan man ni Senadora Loren Legarda.
Wara man na senador an nagkontra sa nominasyon ni Sotto bilang lider kan Senado.
Kaiba an saiyang pamilya tulos man nanumpa si Sotto bilang bagong presidente kan Mataas na Kapulungan.
Mantang naelihir man si Senador Panfilo “Ping” Lacson bilang bagong Senate President Pro Tempore kan 20th Congress.
Rinibayan ni Lacson si Senador Jinggoy Estrada.
Maserbi man si Senador Juan Miguel Zubiri bilang bagong Majority Floor Leader kan 20th Congress.
Rinibayan ni Zubiri si Senador Joel Villanueva.
Kun magigiromdoman, nagin Senate President na man si Sotto III kan panahon ni dating Presidente Rodrigo Duterte.
Kan haputon man ini mapadapit sa rason kan tulos na pagbabago sa liderato kan Senado, sinabi ni Sotto na dakol na problema an pigkakahampang kan presenteng pamayo, alagad dae ini konektado sa flood control projects.
