LEGAZPI CITY – Inomaw kan Influencer Lawyer na si Atty. Carlo Ybanez an pagkapot ni House committee on justice chairperson Gerville Luistro sa piggigibo nindang impeachment proceedings laban kay Vice President Sara Duterte.
Sa intrevista kan Bombo Radyo Legazpi sa naunambitang abogado, sinabi kaini na sadyang dae nasabotan ni Sagip Partylist Representative Paolo Marcoleta an proseso kan proceedings kun kaya pinugulan kaini na busision an background asin kredibilidad kan nagpabistong bagman na si Ramil Madriaga.
Pagdoon niya na an pighahagad ni Rep. Marcoleta na pagbusisi sa background asin kredibilidad an pwedesir na mangyari ini enkaso isakat an kaso sa senado para sa impeachment trial alagad paglilinaw o pagbusisi sana sa isinumiteng affidavit o sinumpaang salaysay an presenteng magigibo kan House committee on justice.
Inomaw niya man an pagtuyaw ni Rep. Luistro sa mga kapwa niya mambabatas na na naglalagpas na suboot sa sinumpaang salaysay ni Madriaga asin pabayaan na an Senado na mag-aram kaini enkaso isakat na sainda an kaso.
Segun pa sa abogado na si Madriaga pa sana an natapos sa enot na pagdangog asin pwedesir na may mga testigo pang maruluwasan sa mga masunod na pagdangog nganing mapatunayan kan Kongreso kun isasakat an articles of impeachment o dagos nang madi-dismiss an reklamo.
Dugang pa niya na magayon kuta an impeachment proceedings kun nag-atendir si Vice President Sara Duterte nganing mapalagan kaini an mga pahayag ni Madriaga asin nganing madepensaran niya man nin personal an saiyang sadiri.
Pig-aabangan na sa presente ni Atty. Ybanez an magigin kahinatnan kan pagdangog urog na kun pagsasama-samahon na an mga pahayag kan mga maluwas na testigo.
