LEGAZPI CITY – Pig-ofresir na man kan Department of Education Bicol an Balikbayang Manggagawa o an National Reintegration Network Regional Fair.
Segun ki Department of Education Bicol Spokesperson Mayflor Jumamil sa intrevista kan Bombo Radyo Legazpi na katuyuhan kaini na matabangan an mga nag-uurulian na mga Overseas Filipino workers (OFWs) partikularmente na an mga naapektaran kan gyera sa Middle East.
Magigin katabang man ninda sa naunambitang programa an Department of Migrant Workers (DMW) Bicol nganing mag-akomodar sa mga kahapotan asin application para sa iba’t ibang programa siring man an pagtatao nin impormasyon nganing magtaong giya sa mga OFW mapadapit sa mga serbisyo na pwedesir nindang aprobitsaran.
Madepende man suboot sa numero kan mga nag-uruli na OFWs an magigin numero kan saindang maseserbisyuhan sa rehiyon alagad pigkakarkulo nindang pwedesir ining umabot sa labi 100 beneficiaries.
Punto man kan opisyal na dae sana sinda nakatutok sa mga estudyante asin edukasyon kundi may pagmakulog man sinda sa mga kapwa nindang Pilipino na nag-uruli sa nacion makalihis an iriwal sa Gitnang Silangan.
Nangapodan man si Jumamil sa mga OFW na lisensyadong paratukdo asin balak na magbalik sa pag-aadal na mawot aprobitsaran an saindang programa na dae magduwang isip na magbisita sa saindang regional office asin mga school division offices nganing matabangan sinda sa saindang mga kahapotan.
