LEGAZPI CITY – Narisa kan sarong abogado na detalyado an nagin statement kan testigong si Ramil Madriaga na nagpabistong dating aide ni VP Sara Duterte, sa pagdangog kan House Committee on Justice katakod kan impeachment proceedings.
Segun sa Influencer Lawyer na si Atty. Carlo Ybanez sa intrevista kan Bombo Radyo Legazpi na kun legal na basehan, mas mawot ni Madriaga na panindugan an saiyang mas binutasan na pahayag asin igwa ini nin pighuhugutan urog nang dakol ining detalyeng ibinugtak arug kan mga petsa asin mga pinagaranang indibidwal.
Punto pa niya na bako sana suboot salaysay an ipinahiling kan testigo kundi kabale na an mga ladawan na magpapakusog kan saiyang affidavit na pwedesir gamiton kan mga komite asin korte nganing hilingon kun may katotoohan an saiyang pigsasabi.
Ikinabigla niya man an pasabog ni Madriaga na nagastos sana suboot sa laog nin 24 oras an P125M confidential funds kan 2022 kun sain detalyado man kun kay sisay, oras asin sain niya ini ipigdeliver na taliwas sa naenot na pahayag sa ibang pagdangog na uminabot suboot nin 11 aldaw antes nagastos an pondo.
Dugang pa kan naunambitang abogado na dati nang aram kan publiko an mapadapit sa paggastos kan Bise Presidente sa confidential funds sa ibong kan wara pa nin malinaw na katibayan na nangyari ini alagad huli sa testimonya asin rebelasyon kan nagpabistong dating aide ni VP Sara Duterte na pwedesir nang gamiton bilang ebidensya.
Inomaw niya man an pagpirma ni Ramil Madriaga sa sarong bank secrecy waiver nganing tugutan an House of Representatives na siyasaton an saiyang mga bank account na sinambit sa saiyang supplemental affidavit.
Kun si Atty. Ybanez suboot an hahaputon, dakula asin makusog na an nahihiling niyang grounds para sa probable cause nganing isakat an kaso sa senado para sa sarong full blown impeachment trial.
