LEGAZPI CITY- Preparado na an security measures na ipiglatag kan mga kapulisan sa Sorsogon sa pagbisita ni President Ferdinand “Bongbong” Marcos Jr. sa Kasanggayahan festival.
Segun kay Sorsogon Police Provincial Office Spokesperson Police Major Arwin Destacamento sa intrevista kan Bombo Radyo Legazpi na padagos an saindang pakikipag-olay kaibanan an manlain lain na mga ahensya de gobyerno ngani na masyerto na mamamantenir an seguridad sa bilog na durasyon kan pagbisita ni Presidente Marcos.
Pigtaram man kaini na dakol an darakulang aktibidad na nakalinyada kun kaya pinaglalaoman kaini an pagdagsa kan mga turista asin mga bisita na makikiugma sa mga programa.
Pigtawan doon pa kaini na labi 500 na kapulisan an idedeploy sa selebrasyon sa naunambitang festival.
Kaiba man an sa pagdeploy kan saindang tauhan an manlain lain na ahensya de gobierno siring kan mga personahe kan Bureau of Fire Protection Sorsogon.
Pakiuron man ni Destacamento na magin rigmat an publiko sa mga palibot kaini nin huli ta mas maray suboot an pag-iingat dawa nakahanda an saindang seguridad asin para man sa saindang karahayan.
