LEGAZPI CITY – Sasabaton nin hiro protesta kan nagkapirang mga progresibong grupo an State of the Nation Adress ni Presidente Ferdinand “Bongbong” Marcos sa Lunes, Hulyo 22.
Sa intrevista kan Bombo Radyo Legazpi kay Nica Ombao an regional coordinator kan Gabriela Bicol, magtitipun-tipon an mga miyembro kan progresibong grupo sa freedom park kan Guinobatan ngani na ipahayag an mga pangapudan asin agrangay sa gobyerno.
Kaiba sa mawot na maipaabot kan grupo an pangapudan na ibasura na an Oil deregulation law sa hampang kan padagos na pagmahal nin presyo nin produktong petrolyo na nagpapalala nin inflation.
Pangapudan pa kan grupo an pagbasura sa anti-terorism law, pagpundo sa red tagging asin pagpapakusog sa sistema nin edukasyon.
Pighahanap man kan grupo an P20 kada kilong bagas na pigpromesa kan Presidente durante kan nakalihis na eleksyon.
Napag-araman na taun-taon ng pigsasagibo kan Gabriela Bicol asin iba pang mga progresibong grupo an nasabing aktibidad na pigtatapat sa SONA kan Presidente.
Alagad ini an enot na bes na sa Guinobatan isasagibo huli ta nasa renovation pa an freedom park sa ciudad nin Legazpi.
