Nagpromesa si Presidente Ferdinand Marcos Jr. na papakusugonpa kan gobierno an seguridad sa mga eskwelahan asin an professional development kan mga paratukdo sa bilog na nacion.
Sa saiyang pahayag sa pagselebrar kan National Teachers Month, sinabi kan presidente na padagos na nakikipagtabangan an gobierno sa mga magurang, komunidad asin iba pa ngani na gibuhon na mas salbado asin mas nakakapagtao kan pangangaipo kan mga estudyante sa mga eskwelahan.
Tinawan duon niya an pagpaparahay asin training kan mga paratukdo sa bilog na panahon kan saindang karera.
Kaibanan sa mga lakdang kan administrasyon an Teacher Education Roadmap 2035, scholarship program para sa Teacher Education Centers of Excellence, asin My Teacher Education Commons (MyTEC), na sarong digital platform para sa padagos na pagkanuod kan mga paratukdo.
Segun ki Presidente Marcos na importante an papel kan mga paratukdo sa ibong kan pagtalubo kan teknolohiya asin artificial intelligence huli ta dae kayang ribayan kan teknolohiya an pagabay kan sarong paratukdo para sa mga estudyante.
Inenganyar man kan presidente an mga paratukdo na turuan an mga estudyante na magin mapanuri, tataong magdesisyon, asin igwang malasakit sa kapwa.
Pinasalamatan man kaini an mga paratukdo sa nacion huli sa saindang pagsisikap asin dedikasyon.
