LEGAZPI CITY-Padagos na pigsusuportaran kan Department of Science and Technology (DOST) Bicol an pigaapod na smart agriculture technology para sa mga paraooma sa komunidad.
Segun kay DOST Bicol Regional Director Rommel Serrano sa intrevista kan Bombo Radyo Legazpi, na nakalatag an saindang mga programa sa rehiyon kun sain target sa ngonian an mga plantation crops siring kan mais, bagas, asin iba pang commodities.
Sa implementasyon kaini, kinakaipuhan suboot ninda an dakulang budget asin hilingon an mga good product asin commodity an papakusugon pa sa rehiyon huli ta magkaiba an pigagamit na teknolohiya para digdi sa kada probinsya.
Padiit-diit man suboot na pigpapabisto an konsepto kan ‘Robotics’ o ‘Grown technology’ na kinakaipuhan sa mga plantation ngani matawanan nin solusyon an saindang problema sa pananom.
Pigeenganyar man an mga paraooma na magin bukas sa pagkakaigwa nin koordinasyon sa ahensya asin dai magduwang isip na aprobitsaran an mga makabagong teknolohiya huli ta pinag-adalan ini kan mga siyentipiko para sa ikakarahay kan bilog na komunidad sa rehiyon.
