Nagbwelta si Senador Rodante Marcoleta ki Senate Blue Ribbon Committee Chair Panfilo Lacson kasunod kan pagluwas kan ‘Minority Report’ kan minorya kan Senado.
Enot na inapod ni Sen. Ping na pambabastos sa Blue Ribbon Committee asin sa halangkaw na kapulungan an pagpaluwas kan report kan minoriya, urog nang dae pa man nagluluwas an committee kan sadiring committee report.
Dugang pa ni Lacson na an pinakamarahay na lugar para sa siring na report iyo an sa basurahan.
Segun ki Sen. Marcoleta, dapat binasa muna kan Blue Ribbon chair an laog kan nasabing report antes apodon na basura.
Rason kan Senador, bako man maraot na bagay an pagpaluwas kan report, urog nang dae man nagpapaluwas nin sadiring report an komite, maski dati nang nagpromesa an chairman na magpapaluwas nin partial report.
Hinapot kan Senador kun nuarin mahihiling kan mga Pilipino an aktwal na kopya kan report kan Blue Ribbon Committee, huli ta nagkapirang hearing an ginibo poon pa kan nakaaging taon.
Ipinaliwanag kan Senador na an pagpaluwas kan minoriya kan sadiring report iyo an pagbusol sa komite na magpaluwas nin maski partial report makalihis an halawig na serye nin mga pagdangog.
Binalikan man ni Marcoleta an enot na tulong hearing na ginibo niya sa halipot na panahon na siya nagin chairman kan poderosong komite.
Hale suboot an laog kan minority report sa pinaka-enot na tulong hearing na saiyang pinangenotan asin an tulong suminunod na hearing na pinangenotan ni Sen. Lacson bilang masunod na chairman.
Kun pigkokonsidera suboot ni Sen. Lacson na basura an nasabing report, garing sinabi man kan saiyang mga kapwa Senador na basura an enot na tulong hearing na pinangenotan niya.
