LEGAZPI CITY-Nanindugan si Senador Panfilo “Ping” Lacson na dai niya suboot pipirmahan an ratipikasyon kan 2026 budget bill kun ibubusol kan bicameral conference committee an pagpondo sa mga kontrobersiyal na aid programs na binatikos niya bilang bagong “pork barrel.”
Kabali sa pigtuyaw kan Senador iyo an kontrobersyal na P51 bilyon na pondo para sa Medical Assistance to Indigent and Financially Incapacitated Patients (MAIFIP) kan Department of Health (DOH).
Nanindugan an Senador na dapat i-realign an nasabing pondo sa mga programa kan Universal Health Care arog kan pagsakop kan gabos na barangay asin pagsierto na zero billing.
Tinawan duon man niya na an mga guarantee letters hale sa mga pulitiko iyo sana an mabukas sana nin paagi para sa patronage politics asin bako an kinakaipuhan na pag-ataman sa salud kan mga Pilipino, orog na kan mga pobre.
Irinekomendar kan Senador na pwedisir magkaigwa nin safeguards sa paagi kan special provisions mantang nagpapadagos an bicam deliberations partikular ngani mapugulan na makontrol an mga tabang pinansiyal nin warang tamang assessment.
Pigtukoy man kan Senador na nakakumbinsi sa saiya na dai magpirma ratipikasyon kan budget iyo an farm-to-market roads project kan Department of Agriculture kun saen an alokasyon kan BICAM na P33 bilyones, doble sa kahagadan kan Presidente.
Sa ngonian, nagpapadagos pa an pag-reconcile kan bicam sa pinal na mga probisyon kan 2026 budget bill.
Sa oras na maisapinal na, ibabalik ini sa Upper asin Lower Houses kan Kongreso para sa ratipikasyon.
