LEGAZPI CITY-Naaksidente an sarong Utility Van sa Purok 2 Barangay Namantao Daraga Albay na nagresulta sa pagka-irido kan 3 sakay kaini asin pagkabangga kan 3 ibang mga behikulo na nakaparada sa mismong lugar.
Segun kay Daraga MPS Police Lieutenant Colonel Edgar Azotea, sa intrevista kan Bombo Radyo Legazpi, pasiring suboot an behikulo sa Sorsogon haleng Daraga asin nawaran nin kontrol an driver na nagresulta sa pagkaruso kan iba pang mga behikulo hasta magtama ini sa sarong kahoy.
Tinamaan an mga naka-park behikulo, sarong motorsiklo, tricycle, asin sarong L-300 sa gilid kan tinampo na wara man nin mga sakay na tawo.
Irido man an 4 katawo, an driver na nasa edad 45-anyos, asin an tulong iba pa nasa 40-anyos man na basado sa impormasyon kan otoridad, nagsapo nin mga lugad asin gasgas sa saindang mga lawas.
Dai man suboot nin planong kasuhan kan tulong sakay kan van an driver huli sa magkakatrabaho an mga ini asin dai man suboot pigtuyo kan driver an nasambitang insidente.
Dagdag pa kan opisyal na sa mechanical an nagin dahilan kan aksidente asin katuwang ninda sa pagresponde an NRRMO Daraga.
Igwa man suboot na paninimbagan an driver mapadapit sa mga damages kan mga nakaparadang behikulo asin kun dai makapag-comply, pwedisir man siyang makasuhan.
Abiso ni Azotea sa mga biyahero na magpahingalo enkaso napapagal na sa pagbyahe asin pwedisir na magpundo sa gilid kan tinampo siring kan mga Barangay hall asin police stations.
Pigpapayuhan man an mga driver na magmaneho nakainom nin alak, asin siertuhon an mga sasakyan bago magbyahe ngani maibitaran an mga aksidente.
