LEGAZPI CITY – Sarong storage facility kan sarong establisyemento an nasulo sa Barangay Poblacion, banwaan kan Dimasalang sa provincia kan Masbate.
Segun ki Dimasalang Municipal Fire Station Senior Fire Officer 2 Wilcel Dinglasan sa intrevista kan Bombo Radyo Legazpi na inabot nin haros duwang oras an pagtumpos ninda kan kalayo antes ideklarang fireout.
Uminabot man suboot sa second alarm an kalayo huli sa dakula kan area pati man an dakol kan mga laman kan bodega na nagtaong kadifisilan sa saindang lado.
Napag-araman man na mga plastic ware asin iba pang mga furniture na gibo sa kahoy an laog kan nasabing pasilidad na nagpadakula man kan nangyaring kasulo.
Pigtaram pa kan opisyal na sa kagayunan an dae na man naglakop an kalayo asin dae na nakadamay pa sa kataraid kaining harong asin establisyemento.
Huli ta maagahon nangyari an kasulo an wara man ki nadanyaran o nairido sa nangyaring kasulo mantang nagsasagibi na sinda nin imbestigasyon nganing aramon kun sain nagpoon an kasulo asin kun ano an kawsa kaini.
Basado man sa saindang inisyal na pagtataya an pigkakarkulong maabot sa P13M an kabilugang danyos kan nasulong warehouse.
Nagpasalamat man si DInglasan sa publiko kan nasabing barangay huli sa ginibo kaining bayanihan nganing dae maubusan nin tubig an mga firetruck kan saindang ahensya.
