LEGAZPI CITY-Nagpagirumdom an sarong Sarong Professor sa mga media outlets na magin responsable sa pag-report kan mga school shooting.
Segun kay UP College of Media and Communication Prof. Danilo Arao, sa intrevista kan Bombo Radyo Legazpi, na siring kan nangyari sa Zamboanga City, huli ta imbuelto an Junior High digdi, kaipuhan protehiran an saindang privacy.
Orog na igwang body cam asin na-videohan an insidente asin naka-livestream sa social media, sa hiling kan Propesur na bako ini tamang hilingon.
Kun kaya nangapudan siya sa mga opisyal, content creators o magin sa media na limitahan o dai na ini ipag-share sa publiko.
Sa lado kan media, posible suboot na i-heras ini sa paagi kan pagkua kan pirang footages, dai pag-pangaranan an mga biktima huli sa privacy kan eskwelahan asin pamilya.
Kaipuhan man suboot na nakaukit sa isipan kan kadakol an igwa kaining insidente asin dai na dapat mautro pa.
Pig-halimbawa man kaini an mga report na manungod sa konteksto kan bullying kaya nakagibo nin krimen.
Pig-doon ni Arao na bako dapat siring kaini an tendensya kan mga reports asin mas maayos kun bubusisihon kun ano an pinaka-rason kan mga insidente, orog na bako isolated incidents ini.
Kinakaipuhan man suboot an pagbilog nin sistema sa contextual accuracy sa paghubog kan opinyon kan publiko na dapat bako mapadapit sana sa trivia kundi sa marikas na solusyon.
Dagdag pa ni Arao na kaipuhan pag-adalan an sirkumstansya asin konteksto kaini, halimbawa na an kakulangan sa mga guidance counselors sa mga eskwelahan.
Siring man an ratio kan mga estudyante sa laog kan klasrum na posibleng rason kaya dai natutugunan an pangangaipo kan mga estudyante.
Katakod man kan pahayag ni Usec. Castro, sinabi ni Arao na iresponsable an ‘finger pointing’ sa rason kan mga insidente.
Posible suboot na huli sa kawaran nin maayos na environment sa eskwelahan o sa pamilya, mayayaman man o mahihirap na pamilya.
Pagirumdom kan Propesur sa publiko na siertuhon an environment ngani mabantayan an mga estudyante.
Sa lado kan gobierno, kaipuhan na hilingon an presenteng kalagayan kan mga estudyante sa eskwelahan.
