LEGAZPI CITY-Nangapudan an liderato kan Kamara sa publiko na mag-iwas sa pagshare o pag-repost nin mga graphic photos, videos, asin an bako beripikadong impormasyon manungod sa nangyaring pambabadil sa Banga National High School sa South Cotabato.
Segun ki House Speaker Faustino “Bojie” Dy III, dapat na mag-exercise nin responsibilidad an publiko mantang pighahalat an kumpleto asin beripikadong impormasyon madapit sa insidente.
Sinabi niya na an paglikay sa pagpalakop nin mga sensitibong content, sarong paagi man nin pagpahiling nin paggalang sa mga biktima asin sa saindang mga pamilya.
Sa bagay na ini, an House Basic Education and Culture Committee Chair Roman Romulo nag-agyat man para sa pagpakusog kan Good Manners and Right Conduct (GMRC) asin suporta sa mental health para sa mga estudyante, kabale an pagtukdo nin paggalang sa buhay asin an matoninong na pagresolbar kan mga iriwal.
Mientrastanto, si Dy asin Majority Leader Sandro Marcos nagsangat kan House Bill No. 11387, o an Responsible Firearm Ownership and Safe Storage Act, na may katuyuhan na mas mahigot an safeguards ngani na maibitaran an mga menor de edad asin bako awtorisadong persona sa pag-access nin badil.
An insidente sa Banga National High School, iyo an ikatulong fatal na pambabadil sa eskwelahan sa nacion sa laog nin wara pang apat na bulan.
