LEGAZPI CITY—Makalihis na magtago sa mga otoridad nin haros 16 na taon, naarestar an sarong lalaki na may kasong pagbalgar laban sa operasyon kan illegal gambling sa Barangay Bitano sa ciudad kan Legazpi.
Segun ki Legazpi CPS PIP Police Executive Master Sergeant, Carlos Paña, sa intrevista kan Bombo Radyo, minidbid an suspetsado na si alyas “Yogs”, 42-anyos, residente kan naunambitang lugar.
Makalihis na basahan an suspetsado nin mandamiento de aresto tulos man ining nag-iba sa mga otoridad.
Haloy na suboot na may kaso na isinunad sa korte laban sa suspetsado huli sa pagbalgar sa Presidential Decree 1602 sa pag-amiendar kan Republic Act 9287 o an “Act Increasing the Penalties for Illegal Numbers Games.”
Pigtaram kan opisyal na kaya uminabot nin 16 taon an pagtatago kaini hulit ta palipat-lipat suboot an suspetsado na lugar para dae mahanap kan mga otoridad.
Alagad sa tabang kan mga residente sa lugar nagin madali ining naarestar kan mga kapulisan.
Dugang digdi, na pigtugutan man ini kan korte na makapagpiyansa sa kantidad na P100,000 para sa temporaryong libertad.
Mientrastanto, sa ngunyan an suspetsado nasa kustodiya na kan Legazpi City Police Station asin mahalat nin Commitment Order gikan sa RTC Branch 2, Legazpi City para maibalyo sa Legazpi City, Bureau of Jail Management and Penology en kaso na dae ini makapagpiyansa.
