LEGAZPI CITY—Sarong 19-anyos na lalaki an naarestar kan mga otoridad makalihis na manghabon sa sarong tiendahan sa Legazpi City Grand Terminal sa ciudad kan Legazpi.
Segun ki Legazpi CPS PIO PEMS Carlos Paña, sa intrevista kan Bombo Radyo Legazpi, na kan naaging aga kan pagbukas kan sarong sales crew sa sarong hub sa nasambit na terminal, may naobserbaran suboot ini nin kakaiba. Kun saen namalisyahan kaini na may gunting asin nagisi suboot an talukbong kan saiyang mga paninda.
Tulos man ining ini-report kan biktima sa mga otoridad kun saen tulos man na nagkundusir nin imbestigasyon an mga kapulisan.
Napag-araman na maabot sa P9,000 na kwarta an nawawara sa kahera.
Dugang kan opisyal, na susog sa saindang back tracking gamit an CCTV sa lugar, namidbidan ninda an suspetsado, kun kaya nagsagibo na sinda nin mga dokumento, alagad kan pagbalik ninda sa tiendahan nahiling ninda an suspetsado na naglalakaw-lakaw asin tulos nindang inarestar ini.
Minidbid an suspetsado na si alyas “Dagul,” 19-anyos, asin residente kan Barangay Sta. Elena, Sorsogon City.
Pigtaram pa kan opisyal, na igwa pang sarong kaso an suspetsado na iyo an Anti-Fencing Law, huli ta an cellphone na nakumpiskar sa saiya dati nang nai-report sa saindang opisina na nawawara.
Sa presente, naisunad na an magkakanigong kaso laban sa suspetsado.
