LEGAZPI CITY- Pigpapaliwanag kan Sangguniang Panglalawigan an Albay Power and Energy Corporation (APEC) kung papano an sistema kan billing makalihis an ipinaotob na paglangkaw sa singil na nasa P13.95 per kilowatt hour.
Sa intrevista kan Bombo Radyo Legazpi kay Board Member Vic Ziga Jr. an Chairman kan Commitee on Energy sa Sangguniang Panglalawigan, sa masunod na semana sa Hunyo 28 ipapaapod an mga opisyal asin representante kan APEC ngani na mag-eksplikar sa naasbing isyu.
Pigkukwestiyon kaya kan opisyal kung papanong labi an iminahal kan singil sa kuryente na wara man lamang na ipinaluwas na magkakanigong abiso asin dae nakipagkoordinar sa mga konsumidores.
Aminado man si Ziga na dakol na mga konsumidores an nagpapaabot na nin reklamo sa sistema kan billing kan power distributor na nahahampang man sa mga reklamo nin palpak na serbisyo huli sa pautro-utrong brownout.
Pagirumdom man kaini sa APEC na dapat na ikonsidera an mga konsumidores huli ta maski na sarong pribadong kompanya konsiderado man giraray ining public utility na nagseserbisyo sa publiko.
