LEGAZPI CITY—Arestado an Rank 3 Most Wanted Person kan Cubao Police Station sa Quezon Street, Barangay Pating, Masbate City.
Segun ki Masbate Police Provincial Office Public Information Officer Police Captain Estrella Torres, sa intrevista kan Bombo Radyo Legazpi, naarestar an suspek sa pinagsarong operatiba kan Regional Intelligence Division/Regional Special Operations Unit 5, Provincial Intelligence Unit, Provincial Police Drug Enforcement Unit, 1st and 2nd Provincial Mobile Force Companies, Masbate City Police Station, asin sa pakikipagkoordinar sa personahes kan Cubao Police Station 7, Quezon City Police District.
Binisto an suspek na si alyas “Edgar,” 62-anyos, lalaki asin residente kan No. 60-B, 20th Avenue, Barangay Murphy, Quezon City.
Naarestar ini sa ipinaluwas na mandamiento de aresto sa kasong panlulugos na may pigrerekomendang piyansa na P120,000.
Sa presente, sinabi ni Torres na nakapagpiyansa na an suspek.
Mientrastanto, padagos man an mga operasyon kan mga kapulisan sa paghanap sa mga padagos na nagtatago sa ley kan nacion.
