LEGAZPI CITY – Magpapaotob nin mahigot na quarry enforcement sa provincia kan Albay an na re-organizar na Provincial Mining Regulatory Board.
Segun kay Mines and Geosciences Bureau Bicol Director Engr. Guillermo Molina Jr. sa intrevista kan Bombo Radyo Legazpi na an naunambitang pagre-organizar an base man sa kahagadan ni Albay acting Governor Glenda Bongao asin igwa sindang anom na representante sa mga grupo kan mga mining asin quarrying operators sa provincia nganing magkaigwa nin kapalitan enkaso may dae makaatendir sa isasagibo nindang mga orolay.
Obheto kan saindang board na mag-agi an gabos na mga quarrying asin mining operation sa gigibuhon nindang evaluation para sa issuance kan license to operate alagad nasa hurisdiksyon pa man giraray suboot kan gobyerno provincial an pagregulate kan quarrying asin pagmimina mantang sinda an pagbabasehan kun dapat tawanan nin permit an mga operator.
Pigtaram man ni Molina na masagibo sinda nin mga serye nin monitoring sa mga quarrying area nganing mairekomenda ninda sa gobernador kun dapat ining tawanan nin permit o dagos na ipasara.
Dapat suboot na nagsusunod sinda sa mga basic requirements asin importanteng nakasumiter nin assessment report na piggigibo kan Albay Provincial Environment and Natural Resources nganing madeterminar ninda na kun kwalipikado pa an mga operator para mag renew asin tawanan nin permit.
Pangapodan kaini sa mga operator na ma-apply kan saindang renewal sa masunod na taon na asikasuhon nin amay an saindang mandatory requirements asin magsumiter na sa Albay provincial mining regulatory board nin electronic copies kan saindang application nganing mapunan nang maproseso an saindang permit to operate.
