LEGAZPI CITY – Nakapagrehistro man nin landslide asin pagbabaha an provincia kan Albay makalihis an haros apat na aldaw na pag-uuran huli sa epekto ni Bagyong Wilma.
Segun ki Albay Governor Noel Rosal sa intrevista kan Bombo Radyo Legazpi na kadaklan sa mga lugar na nakapagrehistro nin pagrasay nin daga iyo an mga banwaan kan Tiwi, Sto. Domingo, asin Guinobatan.
Padagos man an retrieval operation kan mga otoridad mapadapit sa nawawarang 14-anyos na aki na pigtutubudang inanod sa salog sa Barangay Salvacion sa banwaan kan Sto. Domingo na pigkakahandalan na nasa dagat na ini sa presente.
Nakikipagkoordinar na man siya sa mga lokal na gobierno para sa tulos na pagsasagibo nin clearing oparation asin sa Department of Public Works and Higways para man sa remiedial meassures na pwedesir gibuhon sa mga apektadong lugar.
Pigtaram pa ni Rosal na permihang nakapreparar an saindang asistensya na nakatalaang ibarewas sa oras na maresibi na ninda an datos hale sa mga barangay sa provincia.
Mientrastanto, sa ibong kan mga nag-aging kalamidad, pigsyerto man kan gobernador na may itatao man sindang mga pamasko para sa gabos na kaakian sa provincia kan Albay.
