LEGAZPI CITY- Ipigkokonsiderar na welcome development kan Bicol Regional Peace and Order Council (RPOC) an propuesto na pagtataong-armas sa mga barangay chairman sa obhetong mapangatamanan an seguridad kan mga ini.
Magigirumduman na mismong si Department of Interior and Local Government (DILG) Undersecretary for Barangay Affairs Martin Diño an naghayag kaini sa pagbisita sa Albay.
Sa intrevista kan Bombo Radyo Legazpi ki RPOC Chairman asin Legazpi City Mayor Noel Rosal, makakatabang suboot an inapod kaining ‘improvement’ sa pag-asegurar kan matanos na peace and order situation alagad kaipuhan pa man suboot na mag-agi sa tamang proseso antes na matawanan kan armas an mga ‘responsableng opisyal’.
Segun pa ki Rosal, isairarom muna an mga barangay chairman sa neuro-psychiatric examination asin iba pang requirements saka i-assess kun kwalipikado sa pagkapot nin badil.
Mientras tanto, magsisirbe man suboot na deterrent an armas urog na sa mga opisyal na regular na nakakaresibe nin death threats sa lugar na halangkaw man an lebel kan kriminalidad siring man sa mga remote barangays.
Sa ibong na lado, mas marhay pa man suboot kun maipapasar sa Kongreso an propuesto bilang ganap na ley tangarig na maisairarom man sa public bidding asin allocation an babakalon na armas asin an lebel kan badil na angay asin kakayanon kan pondo kan barangay.
