LEGAZPI CITY- Tinawang-duon kan Philippine National Police (PNP) na kapot man giraray kan rehiyong Bicol an pinakahalangkaw na numero kan mga election-watchlisted areas dawa pa igwang pighihiling na Category 1 hasta 3 an election watchlisted areas.
Segun ki PNP spokesperson PC/Supt. John Bulalacao sa nagin intrevista kan Bombo Radyo na intelligence report an binasehan kan organisasyon sa impormasyon susog sa mga factors na ipig-categorize kan Directorate for Intelligence kan PNP asin iba pang intelligence groups kan puersang panseguridad.
Enot naman na napag-araman ki Police Regional Office 5 spokesperson PS/Insp. Maria Luisa Calubaquib na datos pa kan taong 2013 an nagin angkla kan PNP na nagpapahiling na nasa 730 barangay an nasa Category 1; 480 sa Category 2 mientras na 48 man na lugar an nasa Category 3 o nasa 1,258 na barangay.
Dugang pa ni Bulalacao na kapot kan Bicol an pinakahanlangkaw na numero sa Category 1 mantang ikaduwa man sa mga rehiyon sa bilog na Pilipinas sa Category 3.
Mientras tanto, masasabing kaibanan sa Category 3 an sarong lugar kun yaon an mga factors siring kan mahigot na political rivalry, presensya kan private armed groups, aktibidades kan criminal gangs, paglakop kan loose firearms asin threat groups siring kan New People’s Army (NPA).
Katakod man kaini, laoman na suboot an dakol na tropa hale sa special action force kan PNP asin Armed Forces of the Philippines (AFP) na ma-operar sa mga nasabing lugar.
