Uminabot sa Pilipinas si Paraguay President Santiago Peña para sa saiyang official visit sa nacion puon Mayo 10 hanggang 11.
Sinabat an Paraguayan delegation sa Ninoy Aquino International Airport Terminal 1 kasuudma, hali sa Taipei, Taiwan kun sain nagsagibo man siya nin suway na official visit.
Segun sa Malacañang, ini an pinaka enot na presidential visit sa pagultangan kan Pilipinas asin Paraguay puon kan mabilog an diplomatic relations kan duwang nacion kan 1962.
Obheto kan pagbisita na pakusugon an relasyon kan duwang nacion sa karakaran, pamumuhunan, asin agrikultura.
Nakatalaan na isagibo sa Malacañang Palace an opisyal na bilateral meeting ni Presidente Ferdinand Marcos Jr. asin Peña ngunyan na Lunes, kun sain pinaglalaoman na pipirmahan an nagkapirang kasunduan sa kooperasyon.
Ipigsaladawan man kan Palasyo Malacañang an Paraguay bilang sarong “emerging partner” kan Pilipinas sa Latin America, na may sarong adhikain sa demokrasya, rule of law, asin international cooperation.
