Pig-iimbestigaran kan Philippine National Police (PNP) an suboot human trafficking scheme na piggagamit sa pagrecruit nin mga Pilipino na dae naghahaloy an napiritan na maglaog sa foreign military service sa ibang nasyon.
Segun ki PNP Chief Jose Melencio Nartatez Jr., nakikipagkoordinar na an kapulisan sa manlaen-laen na ahensya kan gobyerno asin mga foreign counterparts ngani na siyasaton an detalye kan report asin mabisto an mga nasa likod kan sindikato.
Basado sa mga report sa mga awtoridad, an mga biktima an enot na pigrecruit para sa sarong lehitimong overseas employment, alagad dae naghaloy an pigbabago suboot an saindang mga kontrata asin napiritan na maglaog sa mga foreign military forces.
Segun sa PNP, enot na pigbuyagyag kan Inter-Agency Council Against Trafficking (IACAT) an modus operandi, na nagresulta sa mas pinahiwas na koordinasyon kan mga law enforcement agencies ngani na mabisto asin pugulan an sindikato.
Kasabay kaini, nangangapudan an PNP sa mga jobseeker na magin mapanuri asin tulos na isumbong an anuman na kaduda-dudang aktibidad na may kinaaraman sa illegal recruitment o trafficking.
Nagkapirang insidente nin mga Pilipino na imbuelto sa mga foreign armed conflicts an dati nang naireport, kabali na an mga nagkaigwa nin status bilang mga prisoners of war sa Ukraine mantang suboot nakikipaglaban para sa ibang nasyon.
 is investigating an alleged human trafficking scheme used to recruit Filipinos who were soon forced to enter foreign military service abroad.){kind=link}