LEGAZPI CITY – Nagtugdok nin Motorist Assistance Center an mga personahes kan mga kapulisan sa kahalabaan kan Maharlika Highway sa Barangay Salugan, Camalig, Albay kasabay kan pag-obserbar kan Mahal na araw.
Segun ki Albay Police Provincial Office Provincial Director Police Colonel Noel Nuñez sa intrevista kan Bombo Radyo Legazpi na katuyuhan kan lakdang na magtao nin police assistance sa mga byahero asin sa mga maluwas asin malaog sa provincia.
Importante suboot an mga siring kaining inisyatiba nganing mahiling kan namamanwaan an presensya kan mga kapulisan sa mga kakalsadahan urog na ngonian na Semana Santa.
Punto niya man na may maray na bentilasyon an naunambitang assistance center asin magkakaigwa nin masisirungan an saindang mga personahes enkaso magtindi an init kan panahon, magkaigwa nin uran o ashfall hale sa Bulkang Mayon.
Dugang pa kan opisyal na puga puga na man an saindang pagbabantay sa enterong provincia nganing mapa-otob an pazy orden sa enterong durasyon kan Holy week partikularmente na sa mga highway, simbahan, establisyemento, terminals asin iba pang pigruruso kan publiko.
Sa kabilugan suboot, maabot sa poco mas o menos 800 na police personnel an nakadeploy sa ground katabang an manlain-laing ahensya kan gobierno nganing magtaong tabang sa namamanwaan.
Piglalaoman man ni Nuñez na pwedesir bumaba an numero kan mga aksidente sa kakalsadahan asin insidente nin pagkalamos ngonian na 2026 Semana Santa kumpara kan nakaaging taon huli sa pigkakarkulong pagbaba kan numero kan mga biyahero huli sa halangkaw na presyo kan produktong langis dara kan nagpapadagos na giyera sa Middle East.
