LEGAZPI CITY—Pinahimotikan kan PNP Bicol an mga nagkakalat na impormasyon sa suboot mga ‘parakuang-aki’ sa rehiyon.
Segun ki PNP Bicol Regional Director Police Brigadier General Andre Dizon, sa intrevista kan Bombo Radyo Legazpi, na hanggang sa ngunyan wara man na naire-record sa mga hepatura kan kapulisan na nawawara o nagre-report na pamilya mapadapit sa mga nawawarang aki o mga naglilibot na van.
Dugang ni Dizon na dae man ninda pwedesir na ibalewala an nasambit na isyu kaya pighahagad ninda an partisipasyon kan mga personahes na nag-aasigurar kan katrangkilohan sa palibot, na kun saen enot na digdi an mga barangay officials huli ta sinda mismo an nakahiling kan mga nangyayari sa saindang barangay asin sunod na an mga local officials siring man kan mga barangay tanod.
Tinawan-doon kan opisyal na igwa nin mga penalidad sa ley asin pwedesir na kasuhan an pagpapakalat nin mga salang impormasyon mapadapit sa suboot nagdudukot na mga kaakian.
Pigtaram pa kaini na dae man madidificilan an mga namamanwaan na mag-report nin siring na insidente huli ta igwa nin presensya an mga kapulisan lalo na ngunyan na pigpapaotob an Comelec gun ban checkpoint sa mga manlaen-laen na lugar.
Nagmamawot man si Dizon na makipagtabangan an mga kajovenesan sa pagmantenir nin paz y orden sa pag-report nin mga pangyayari sa kapalibutan huli ta dakula man ining bagay na makakatabang sa sainda.
