LEGAZPI CITY- Tatawan kan lokal na gobyerno kan Manila City an World No. 2 pole vaulter na si EJ Obiena nin P500,000 cash reward.
Ini an bilang pasasalamat asin pagbisto sa saiyang tiyaga asin pinamalas na natatanging performance sa Paris Olympics na nagtapos sa ikaapat na pwesto sa pole vault finals kan nakalihis na Martes.
Sa sarong statement, pigsabi ni Manila Mayor Honey Lacuna-Pangan na padagos na nagtatao nin inspirasyon para sa kadakol na aking atletang Pilipino an journey asin trayumpo ni EJ.
Pigpuri man kan alkalde si Obiena kaiba si Golden boy gymnast Carlos Yulo para sa saindang dedikasyon, disiplina asin community sport na source of pride para sa syudad kan Maynila.
Naenot nang pig-anunsyar kan Manila government na makakaresibi si Yulo nin P2 million makalihis maibulsa an 2 gintong medalya sa laog kan 2 magkasunod na aldaw sa gymnastics competition sa Paris Olympics.
An 2 Olympians an parehong tubong Maynila kun saen si Yulo an ipinangaki sa Malate mantang si Obiena man an sa Tondo.
