LEGAZI CITY – Magayon para sa sarong election watchdog an pigsasagibong hearing asin imbestigasyon kan Senate Blue Ribbon Committee manungod sa nangyaring katiwalian sa mga flood control projects kan gobierno.
Alagad segun ki Kontra Daya Convenor Prof. Danilo Arao sa intrevista kan Bombo Radyo Legazpi na dae dapat ini magin hadlang nganing maisiwalat an mga miembro kan Kamara de representantes na pigtuturong imbwelto sa pagkuwa nin komisyon o lagay sa mga pondo kan proyekto.
Madepende man suboot sa accessibility asin availability kan impormasyon sa mga isasagibong imbestigasyon pati na an lifestyle check sa kun siisay man an ma-imbestiga mantang dapat bukas an Department of Public Works and Higways, Commission on Audit, asin iba pang ahensya nganing itao an mga magkakanigong dokumento sa mga makapot kan imbestigasyon.
Pwedesir man na mag-alokar nin pondo an gobierno sa isasagibong lifestyle check alagad magin malinaw kun sain hale an pondong gagamiton dapit digdi.
Pigtaram pa kaini na dapat man magsa-irarom sa lifestyle check si Presidente Ferdinand Marcos Jr. nganing magserbi man ining example sa saiyang kapwa pulitiko asin nganing maipahiling niya sa publiko na wara siyang pigkokonsinte na kun siisay man.
Afuera ki PBBM an dapat magpa-lifestyle check man si Vice President Sara Duterte maski bako magayon an saindang relasyon nganing mapatunayan niya na wara siyang pigtatago.
Pagdoon man ni Arao na sa mga nangyaring trahedya, bako kasalan kan makusog na pag-uuran kun nagkawsa ini nin pagbabaha na naka-apektar sa buhay asin nadistrosong kaharongan asin kabuhayan kundi kasalan ini kan mga nag-apruba kan proyekto asin nasa likod kan mga maanomalyang flood control projects.
