LEGAZPI CITY- Nagpagirumdom ngonian an Philippine Institute of Volcanology and Seismology (PHIVOLCS) sa mga nasa quarry operations katakod kan papapaabot na ‘ber-months’.
Pighahandaan kaya sa nasabing mga bulan an tag-uran asin paglaog kan nagkapirang raot nin panahon sa parte kan Bicol region na posibleng makapagpababa kan loose materials o deposits kan bulkang Mayon sa Albay.
Sa intrevista kan Bombo Radyo Legazpi ki PHIVOLCS resident volcanologist Dr. Ed Laguerta, ipigrekomendar kaini an paghale sa tambak kan quarry resources sa parte kan salugan urog na pighahaditan na makasabay ini asin makapagpadakula kan lahar flow en kaso magbagunas an makusog na pag-uran.
Partikular na pinunto ni Laguerta an volume kan quarry materials na nasa Mi-isi Gully kan Daraga kun saen dakol an natipon na volcanic deposits sa nakaaging pag-aalburoto kan bulkan.
Nag-apelar man si Laguerta sa tabang kan Departamento de Obras Publicas o DPWH tangarig matapos na an pinunang proyekto sa parte kan Brgy. Matanag sa ciudad kan Legazpi na harane sa Buyuan channel na igwa man na dakulang volume kan loose materials.
Napag-araman na nasa 20 million cubic metres an natipong loose materials sa mga gully o river channels puon sa sur-sirangan hasta sulnupang porsyon kan bulkan o pasiring sa Brgy. Quirangay sa Camalig.
