Pighahalat pa kan Embahada kan Pilipinas sa United Arab Emirates an instruksyon gikan sa Pilipinas kun pwedesir na gamiton an arrest order laban ki dating Presidential Harry Roque para makahanap pa nin kadugangan na impormasyon sa pagtitinir kaini sa UAE kaubay an saiyang agom na si Mylah Roque.
Paliwanag kan Philippine Ambassador to the UAE na si Alfonso Ferdinand Ver na dae basta matao nin impormasyon an mga otoridad digdi kun warang arrest order o interpol notice huli ta igwa suboot nin privacy an sarong indibidwal na nasa UAE , legal man ini o ilegal na yaon sa nasambitan na nasyon.
Alagad base sa saiyang huring impormasyon na naresibi presenteng nasa UAE pa si Roque asin an agom kaini.
Magigirumdoman na naenot nang nai-report kan Bureau of Immigration na posibleng nakahali sa Pilipinas si Roque sa ilegal na lakdang huli ta wara ining records sa immigration na naghali ini sa nasyon.
Segun ki Immigration chief Comm. Joel Viado, pinag-aadalan pa kan saindang legal team an pagsunad nin kadugangang mga kaso laban ki Roque huli sa ilegal na pagbiyahe kaini.
Enot digdi, naimbwelto an ngaran ni Attorney Roque sa kasong qualified human trafficking na isinunad man laban ki Cassandra Li Ong asin iba pa mapadapit sa suboot ilegal na aktibidad nin POGO hub na Lucky South 99 Corp. sa Porac, Pampanga.
Mientrastanto, presenteng may outstanding arrest order si Roque gikan sa House of Representatives makalihis na ma-cite in contempt huli sa pagpalyar kaining magsumiter kan mga pighahagad na dokumento na magtatao nin ebidensya sa suboot biglaan na paglangkaw kan saiyang yaman.
