LEGAZPI CITY- Arestado an sarong parahabon makalihis an ginibong pangbibiktima kaini sa banwaan kan Daraga.
Segun ki Daraga Municipal Police Station spokesperson Police Lt. Isabel Nopia sa intrevista kan Bombo Radyo Legazpi na tulong harong an hinabasan kan suspek sa laog sana nin sarong banggi.
Napag-araman na maagahon kan Setyembre 18 kan magsakyada an suspek kun sain natangay kaini sa enot na harong an duwang cellphone asin P5,000 cash.
Sa ika-duwang biktima man, duwang cellphone man an nakuwa kan suspek mantang sa ika-tulong biktima natangay kaini an duwang cellphone, relo asin beltbag.
Segun sa opisyal na nadiskubre ninda na taga Legazpi City an suspek kaya tulos ining nakipag koordinar sa mga kapulisan sa ciudad asin sa tabang kan mga CCTV footages, nadiskubre an pagkakabisto kaini.
Na-recover man sa suspek an mga hinabon na cellphones alagad dae na nabawi pa an cash.
Sa presente nasunadan na nin kaso an suspetsado asin nagtetenir sa hepatura kan Daraga Municipal Police Station.
