LEGAZPI CITY- Nangapudan an grupo kan mga parasisira sa nasyon na Pambansang Lakas ng Kilusang Mamamalakaya ng Pilipinas o PAMALAKAYA nin advance na asistensya gikan sa gobyerno tuyong may kalamidad.
Katakod ini kan panrarapado kan Bagyong Enteng sa nasyon na nagwalat nin rinibong individwal an nadanyaran.
Segun kay Pando Hicap, an Presidente kan Pamalakaya sa intrevista kan Bombo Radyo Legazpi, aminado ining kadakol na mga parasisira sa bilog na nasyon an nawaran nin harong asin kabuhayan huli sa nakalihis na kalamidad asin mas pinahewas pang epekto kan oil spill.
Istorya pa kaini na dae pa nakakarekober an mga naapektaran na parasisira kan naenot na bagyong Karina asin ngunian nadagdagan pa an apektadong parasisira huli naman sa bagyong Enteng.
Pangapudan kaini sa gobyerno na antes paman mag-abot an kalamidad an makatao na tulos nin ayuda sa mga parasisira ngane na dae na ini mapiritan pang maglawod kun igwa ng maraot na panahon.
