LEGAZPI CITY – Na-obserbaran an pagdakol pa kan mga turista ngonian sa Cagsawa Ruins Park sa banwaan kan Daraga, Albay sa ibong kan pagtaas kan Bulkang Mayon sa alert level 3.
Alagad segun ki Cagsawa Ruins Park Administrator Jasper Dugan sa intrevista kan Bombo Radyo Legazpi na maski nagpapadagos an saindang operasyon an mahigot man na ipinagbabawal kan mga otoridad an paglaog kan mga nagsasagibo nin ATV ride sa laog kan 6KM permanent danger zone.
Nagtetenir suboot na normal an saindang operasyon sa presente mantang preparado man sindang magsara enkaso kaipuhanon asin i-abiso kan mga otoridad.
Pagsyerto niya man na nakikipagtabangan an saindang ofisina sa mga kapulisan nganing bantayan an sisay mang mapasaway asin maporbar na maglaog sa 6KM permanent danger zone kan Bulkan.
Pigtaram pa kan opisyal na magtetenir na bukas an naunambitang park nganing magserbing Mayon viewing site hangga’t dae pa ipinagbabawal kan gobierno.
Pagdoon man ni Dugan na maski nagkusog an volume kan nagpapasyar sa Cagsawa Ruins Park an prayoridad pa man ninda liwat an kaligtasan kan gabos urog na ngonian na nagpapadagos an mga aktibidad kan Mayon.
