LEGAZPI CITY — Bitbit an bansag na Padyak Capital of the Philippines, babaluon kan syudad kan Tabaco na mailista sa Guinness Book of World Records sa kategoryang longest parade.
Sa intribista kan Bombo Radyo Legazpi ki Mayor Krisel Lagman-Luistro, kinumpirmar kaini an saindang planong pagbale sa nasambitan na aktibidad.
Sigon sa alkalde, papartisiparan ini kan gabos na padyak drivers sa lugar.
Sa katunayan, nagsagibo na suboot sinda nin dry-run ngani na mahiling kun ano pa an saindang mga pwedesir na idugang ngani na makalaog sa nasambitan na rekord.
Kumpyansa si Luistro na magigin kwalipikado an numero kan saindang mga padyak para sa World Record alagad inako kaini na igwa nang nakagibo kan pinakahalabang parada sa luwas kan nasyun kun kaya nag-iisip sinda nin iba pang pakulo ngani na urog na magin kakaiba an saindang entry.
Aminado man an opisyal na kaipuhan muna nindang hilingon kun kayang mapondohan kan saindang budget an isasagibong aktibidad na piglalaoman na aatindiran asin dadayuhon nin mga personalidad asin organisasyon gikan sa internasyunal na lebel.
