LEGAZPI CITY — Piglinaw kan Philippine Institute of Volcanology and Seismology (Phivolcs) na real-time monitoring instruments man giraray na nakapalibot sa bulkang Mayon an pagbabasehan kan pag-aadal kan kabilugan na kondisyon kan bulkang Mayon.
Ini makalihis na mahiling sa initial data kan precise leveling survey na nagkaigwa nin diit na pag-impis o deflation sa lower portion kan norteng parte kan bulkan o sa banwaan kan Sto. Domingo.
Sa intrevista kan Bombo Radyo Legazpi kay Phivolcs Dir. Renato Solidum, mas importante man giraray an data hali sa electronic tilt-meter na nagpahiling kan padagos na pagsakat kan magma siring man an iba pang instrumento sa palibot urog nang pig-aabot nin pirang aldaw an resulta sa precise leveling.
Mientrastanto, pigduon kaini na padagos man giraray an aktibidad kan bulkan asin dae dapat pagbasehan kan tawo an mga nahihiling sana sa tuktok kan bulkan.
maski suboot natatakupan kan mahibog na panganuron an Mayon volcano, nagkaigwa nin tulo hasta sa apat na lava fountaining events na naghaloy nin nagkapirang oras siring man an pagbulos kan lava.
Sa ibong na lado, hibaba man an pig-aabot na bulos kan volcanic materials sa mga pig-aagihan na channel kun sain nasa 3.2 kilometers na sa Mi-isi channel na nakahampang sa banwaan kan Daraga asin 4.3 kilometers na sa Bonga-Buyuan Gully na nakahampang sa syudad kan Legazpi basado sa data kan Phivolcs.
