LEGAZPI CITY — Liwat na pinatanidan ni Presidential Anti-Corruption Commission Chairman Dante Jimenez an mga government officials na mag-ibitar sa korapsyon.
Si Jimenez an nagsirbeng huespe de honor sa selebrasyon kan Independence Day sa ciudad kan Legazpi.
Sa mensahe kaini, tinawang-duon ni Jimenez an obligasyon kan mga opisyales na makahali sa sistemang bulok asin matuldukan na an korapsyon.
Dugang pa ni Jimenez na dae man suboot kaini tatantanan an mga opisyal na mawot na pagkakitaan an mga resources kan gobierno.
Ipig-ehemplo man kan PACC chairman na saro pang magayon na lakdang tangarig na maipahiling an pagpapasalamat sa mga herowe kan nasyon an pagprotehir sa natural resources.
Kasabay kaini an pagbati ni Jimenez sa mga bagong elihidong opisyal na inabisuhan kaining magin independiente sa anuman antes na mag-asyumer sa posisyon.
