LEGAZPI CITY — Pighahalat na sana kan Legazpi City Veterinary Office an disposal unit hale sa Food and Drug Administration (FDA) tangarig ma-dispose an nakumpiskang mga lata nin pork luncheon meat sa mga business establishment sa ciudad.
Sa intrevista kan Bombo Radyo Legazpi ki city veterinarian Dr. Emmanuel Estipona, nasa 1,200 na lata nin pork luncheon meat hale sa China an nakumpiska sa malls na may manufacturing date na August 2018 pataas.
An nasabing petsa kaya kan pag-manufacture an ipinagbabawal kan FDA asin National Meat Inspection Service (NMIS) huli sa posibilidad na kontaminado ini kan African Swine Fever (ASF).
Segun ki Estipona, sinusog ninda an supplier na nadakupan sa merkado kan pork luncheon meat asin nakua ini sa sarong warehouse sa Bogtong kun sain mas dakol pa an nakumpiska.
Afuera man digdi, nasabat pa kan oficina an 15 kilo nin spoiled meat o karneng orig na raot na.
Maski dae naman naka-display sa sarong meat establishment asin para sa disposal na, mas pinili kan veterinary office na kumpiskahon an mga ini tangarig maasegurar na dae na maipapabakal pa.
An mga nakumpiskang maling asin karne nin orig an nagkakantidad man nin P70,000.
