LEGAZPI CITY—-Natakdag sa kamot kan mga otoridad an sarong lalaki sa kinundusir na drug-buy bust operation sa ciudad kan Ligao, Albay.
Susog sa datos na naguno kan Bombo Radyo Legazpi, naarestar an 49-anyos na suspetsado sa pinagsarong pwersa kan Albay Police Provincial Office, Ligao City Police Station, Philippine Drug Enforcement Agency Regional Office V, PDEA ROV Intelligence and Investigation, PDEA ROV Albay, PDEA ROV Masbate, asin SOU-PDE.
Nakumpiskar sa suspetsado an apat na pidasong heat-sealed transparent plastic sachets na pinagtutubudang shabu asin may gabat na 10 gramos na may kantidad na labi P68,000.
Mientrastanto, nasa kustodiya na kan Philippine Drug Enforcement Agency Regional Office V an suspetsado asin mahahampang sa kasong pagbalgar sa Republic Act 9165 o an Comprehensive Dangerous Drugs Act of 2002.
