LEGAZPI CITY – Aabuton suboot nin P50.3 million an itinagamang kantidad kan Philippine Crop Insurance Corporation (PCIC) para sa mga paraoma sa Bicol na nakakamati kan padagos na epekto kan El Niño.
Ipighayag ni PCIC Bicol Acting Regional Manager Franky Armenia sa intrevista kan Bombo Radyo Legazpi na igwa na suboot na 3, 795 na paraoma an nagsunad nin report na na makakaresibe kan nasabing kantidad nin insurance.
Nasa 304 na man sa mga ini an natawanan na nin P2.7 million na kabilugang kantidad kan tseke para sa dagang may sukol na 572 ektarya.
Dagos-dagos man suboot an pagbisita kan mga personahes sa field tangarig na maberipikaran an mga isinumiter na report sa oficina mantang piglalaomang masakat pa an nasabing numero.
Inengganyar man kan opisyal an mga nasa sektor nin pag-ooma asin pagsisira na magpalista na man sa PCIC tangarig na makakua nin libreng insurance na magagamit en kaso may mga dae maiibitarang danyos causa kan kalamidad.
Segun ki Armenia, naghahagad nin ayuda an 2, 120 rice farmers, nasa 1, 653 na nagtanom nin mais asin 22 high value crops farmers.
