LEGAZPI CITY- Naghahanda na an lokal na gobierno kan Daraga sa pagmamando kan bulos nin trapiko asin pagsierto kan seguridad kan mga estudyante para sa nakatalaan na pagpupuon kan School Year 2024-2025.
Segun ki Daraga Public Safety Office spokesperson Lorenzo Bañas na nakalatag na an saindang deployment plan para sa pagbubukas kan klase sa banwaan.
Sa presente natukoy na man an mga eskwelahan na paglalatagan nin mga personahes ngani na masierto an seguridad kan mga estudyante.
Napag-araman na nakipag dayalogo na man an ahensya sa mga tricycle drivers ngani na masierto na dae makakapagrehistro nin overcharging sa mga estudyante.
Paliwanag ni Bañas na komon na nareresibeng agrangay kan saindang ahensya an suboot halangkaw na singil sa mga tricycle.
Segun sa opisyal na nagpromesa man an mga Toda president na makikipagtabangan sa lokal na gobierno asin pagpapaotob nin tamang taripa.
Katakod kaini, nagpatanid an opisyal na dae makakalusot an mga violators asin posibleng mapatawan nin penalidad an mga ini.
Afuera digdi, pigbabantayan man kan Public Safety Office an mga overloading na mga tricycle asin iba pang mga behikulo ngani na maibitaran an anuman na aksidente asin dae pinaglalaoman na insidente.
