LEGAZPI CITY – Nangapodan an mga opisyales kan Barangay Bascaran, Daraga, Albay sa mga magurang katakod kan insidente nin pagkagadan kan sarong 13 anyos na lalaki makalihis malamos sa sarong salog sa saindang lugar.
Sa intrevista kan Bombo Radyo Legazpi ki Kagawad Emma Lozada, sinabi kaini na dapat dae pagpabayaan kan mga magurang na magpasiring sa salog an saindang aki urog nang napag-araman na dae tatao maglangoy an biktima asin an mga pag-iriba kaining mga kaakian.
Palaisipan man sainda kun nyata piniling magkararigos kan mga kaakian sa naunambitang salog urog nang nasa harayo na ining parte kan saindang Barangay.
Basado man sa saindang pakikipag-olay sa pamilya kan biktima, napag-araman na dae man pigtugutan an aki na magkarigos sa salog alagad nagin sutil suboot ini asin dae sinunod an mga patanid kan saiyang mga magurang.
Piglinaw man kan opisyal na pigporbaran na respondehan kan ibang barangay official an biktima, alagad nadukayan na ining wara nin buhay.
Segun pa ki Lozada na plano man na pag-olayan kan mga Barangay na nakakasakop sa salog na mabugtakan nin mga bakod asin warning signs nganing malikayan an pa an mga siring kaining insidente.
