LEGAZPI CITY- Kinondenar kan gobierno provincial kan Sorsogon an ginibong pagtatapok nin basura sa kadagatan kan Matnog.
Segun ki Sorsogon Provincial Tourism Officer Bobby Gigantone sa intrevista kan Bombo Radyo Legazpi na bisto an Matnog sa mga island hopping activities kaya bako kaako-ako an nasabing lakdang.
Pagbuyagyag pa kan opisyal na saro sa mga flagship program kan provincia iyo an pagmamantenir kan kalinigan kan kapalibutan asin kalikasan.
Napag-araman na enot na naaydentipikaran an may tagibo kan pagtatapok kan basura asin an violator an napag-araman na mismong opisyal kan sarong barangay sa banwaan kan Matnog.
Sa tabang kan iba pang mga ahensya de gobierno, plano na magpaotob nin mas istriktong implementasyon kan mga eksistidong ley ngani na mapanimbag an violator.
Segun ki Gigantone na inako man kan mga barangay officials an pagtatapok nin basura asin nagdepensar na seaweeds ini.
Alagad nanindugan an opisyal na igwang mga plastic an nasabing mga basura asin warang anuman na rason an kaako-ako sa pagtatapok nin basura urog na sa pigpapangatamanan na kadagatan.
