LEGAZPI CITY- Nagkapirang persona an nagpumirit na maglaog sa Bicol University na venue kan kakatapos pa sanang Palarong Bicol 2017.
Antes an nasambitan na sporting event, mismong an Department of Education (DepEd) an nagsugo sa PNP na iimplementar an pagkakaigwa nin car pass durante kan Palaro ngani na maibitaran an masamok na traffic sa laog kan nasambitan na unibersidad.
Digdi man napag-uyunan na kolor orange an car pass kan mga pwedesir na maglaog kan saindang behikulo sa BU asin kolor green an dapat na magparada sana sa luwas asin maglakaw na sana palaog.
Alagad ipighayag ni PSUPT Nilo Berdin, hepe kan Legazpi PNP na igwa nin sarong opisyal gikan sa dibisyon kan DepEd Bacon, Sorsogon na nambastos sa pulis na nagbabantay sa gate kan dae ini tugutan na maglaog huli ta kolor green an saiyang car pass.
Nagpumirit suboot ining maglaog alagad kan dae tugutan, itinapok kaini an saiyang ID sa pulis-OJT ngani na ipamidbid na igwa sya nin halangkaw na posisyon sa DepEd.
Kinondenar ini kan hepe sabay sabi na dapat na irespeto kan dae pinangaranan na opisyal an ipigpapautob na patakaran na mismong an DepEd an proponent.
Pigigibo man sana suboot kan pulis an saiyang trabaho.
Sienerto ni Berdin na dae nya papalampason an ginibo kan opisyal maski baad suboot sa pagal sa Palaro kun kaya ini nag-aborido.
