LEGAZPI CITY—Karsel an bagsak kan pigkonsiderar na Rank No. 1 Regional Most Wanted Person kan Bicol sa sarong operasyon sa Calatagan, Batangas.
Binisto an suspek na si alyas “Joe”, 49 anyos, asin residente kan Rapu-Rapu, Albay.
Naarestar ini sa pinagsarong operatiba kan Rapu-Rapu MPS, Regional Intelligence Division Police Regional Office 5, Albay Provincial Intelligence Unit, Legazpi CPS, Calatagan MPS, asin Coast Guard Sub-Station Calatagan.
Naarestar si alyas “Joe” huli sa bisa kan duwang warrant of arrest: saro para sa kasong Rape by Sexual Assault na ipinaluwas kan Hunyo 26, 2025 na may piyansang P120,000.
Mantang an ikaduwa an para sa 21 counts nin Attempted Qualified Rape of a Minor na ipinaluwas kan Abril 21, 2025 asin may tig-P200,000 na piyansa sa kada kaso.
Mientrastanto, isinairarom an suspek sa medikal na pagsusuri sa Calatagan Medical Hospital asin dinara sa Calatagan MPS para sa magkakanigong dokumentasyon asin disposisyon.
